APEL PËR SOLIDARITET: STOP DHUNËS NË MAQEDONI

Adresuar:

• OKB-së
• Shteteve të Bashkuara të Amerikës
• Qeverisë Zvicerane
• Shteteve te Bashkimit Evropian
• Deputetëve të Parlamentit Evropian
• Komisionit Evropian
• Këshillit të Evropës
• Misionit Monitorues të Bashkimit Evropian
• OSBE-së
• Kryetarit të Maqedonisë
• Qeverisë së Maqedonisë
• Deputetëve të Parlamentit të Maqedonisë
• Mediave ndërkombëtare
• Mediave të Maqedonisë
• Partive politikë të Maqedonisë

Me ngjarjet e fundit në Maqedoni, Qeveria e Shkupit dëshmoi edhe njëherë se ajo nuk e kanë ndryshuar politikën e saj, nuk ka bërë asnjë hap drejt rrugës së një shteti ligjor, por mundohet që problemet e brendshme t`i zgjidh me gjuhën e armëve.

Aksionet e forcave policore në vendbanimet shqiptare, arrestimet, bastisjet dhe provokimet e lloj-llojllojshme ndaj shqiptarëve janë vazhdim i politikës represive e cila është e bazuar në dhunë, dhe terror shtetëror.

Prandaj, ne, shoqatat dhe asociacionet shqiptare të poshtë shënuara, që veprojmë në Zvicër reagojmë ashpër kundër këtyre veprimeve  absurde dhe mesjetare dhe njëherit i bashkangjitemi apelit STOP DHUNËS NË MAQEDONI!

Gjendja politike dhe e sigurisë në IRJM është jashtëzakonisht e rëndë sepse forcat policore, njësitë paramilitare të qeverisë së Shkupit vazhdojnë edhe më tutje të provokojnë lagjet , fshatrat e shqiptarëve etj.

Rast specifik ishte fshati Brodec i cili u sulmua nga të gjitha anët me arsenalin më të rëndë policor dhe ushtarak, duke vrarë, maltretuar dhe ndëshkuar fëmijë, gra dhe pleq.

IRJM ka bërë kërkesë që të regjistrohet në institucionet evropiane dhe euro-atlantike, por ne, ngrisim zërin dhe kërkojmë nga këto institucione të mos e lejojnë pranimin e IRJM pa i plotësuar kërkesat elementare, sepse në rend të parë, ajo, duhet të jetë shtet ligjor dhe demokratik, si dhe duhet të respektoj të drejtën e popullit shqiptar për liri dhe barazi.

Për këtë arsye kërkojmë :

-         Lirimin e menjëhershëm të civilëve të paraburgosur, përmes të cilëve Qeveria e Maqedonisë kërkon të « argumentojë » ekzistencën e komplotit të përmasave të mëdha ;

-          Të krijohet një komision ndërkombëtar për të hetuar krimin policor në fshatin Brodec ;

-         Të merren masat ndërkombëtare për ndëshkimin e fajtorëve ;

-         Të rishikohen të gjitha proceset gjyqësore dhe të lirohen të gjithë të burgosurit viktima të proceseve të montuara ;

-         Të hapet një dialog i mirëfilltë nën mbikëqyrjen ndërkombëtare dhe t’u jepet  përgjigje adekuate tërësisë së problemeve me të cilat ballafaqohet Maqedonia.

-         Me një fjalë : T’I THEMI STOP DHUNËS KUNDËR SHQIPTARËVE TË MAQEDONISË

Nënshkruesit e këtij peticioni janë:
1.     Shoqata Atdhetare “Liria Kombëtare”, Zvicër – Vaxhid Sejdiu, kryetar
2.     Lidhja e Arsimtarëve dhe Prindërve Shqiptarë”Naim Frashëri” i Kantonit St. Gallen – Jakup Hasani, kryetar
3.     Bashkësia Shqiptare, Zvicër – Ahmet Asani, kryetar
4.     Shoqata Mëmëdheu, St. Gallen – Agush Buja, kryetar
5.     Bashkësia Islame, Zvicër – Rexhail Aziri, koordinator
6.     Shoqata e kurbetçarëve nga Shemshova, Zvicër – Mazlam Mazlami,  kryetar
7.     Shoqata humanitare e Luginës së Preshevës, Zvicër – Shaip Bajrami, kryetar
8.     Shoqata Shqiptare “Kërçova”, Vevey – Baftir Emrullai, kryetar