Prapaskenat e zgjedhjes së Pacollit President i Kosovës
www.ereniku.net

---

speciale:
Prapaskenat e zgjedhjes së Pacollit
23/02/2011 09:15
Kosova zgjodhi institucionet e saj, por jo gjithçka shkoi ashtu siç duhej, të paktën jo gjatë zgjedhjes së presidentit të vendit.
Për herë të parë u vunë në pah përplasjet ndërmjet anëtarëve të Partisë Demokratike të Kosovës, ndërkaq që po për herë të parë faktohet ndërhyrja e faktorit ndërkombëtar në çështjet madhore për Kosovën siç është presioni për të votuar pro zgjedhjes së Behgjet Pacollit president.
Proçesi për zgjedhjen e presidentit të Kosovës u zhvillua në tri raunde. Ndërsa në sallën e Kuvendit po qëndronin vetëm deputetet e pozitës, në dy raundet e para zoti Pacolli me votat që po merrte nuk ishte i afrohej aspak postit të presidentit të Kosovës.
Një pauzë e shkurtër të cilën kryetari i Kuvendit e cilësoi jo kushtetuese duket se ndryshoi gjithçka.
Kryeministri Thaçi mblodhi deputetët e tij për atë që u quajt konsultë partiake. Në këtë kohë kishin filluar dilemat e vetë Behgjet Pacollit i cili priste në seancën e Kuvendit. Ai ishte në dilemë të tërhiqej në raundin e tretë apo të provokonte zgjedhjet e jashtëzakonshme duke hyrë pa numër të mjaftueshëm votash në raundin e tretë.
Konsulta e kryeministrit Thaçi me deputetët e tij pason një shkëmbim mesazhesh mes ambasadorit amerikan Christopher Dell, kandidatit për president Behgjet Pacollit dhe këshilltarit të jashtëm të zotit Pacolli.
Mesazhe telefonike të regjistruarara nga kamerat televizive dhe të faktuara nga fotoreporterët kosovarë tregojnë më së miri se si Behgjet Pacolli pak minuta para se të niste votimi në raundin e tretë merr garancinë nga Christopher Dell se në raundin e tretë do të përfundojë gjithçka.
Në mesazhin që Chris Dell ia dërgon Behgjet Pacollit shkruan se Jakup Krasniqi e Fatmir Limaj, pra dy kundërshtarët e Pacollit janë kërcënuar dhe gjithçka do të përfundojë mirë. Behgjet Pacolli u zgjodh në raundin e tretë. Por nënkryetari i PDK-së, Fatmir Limaj e deklaroi votën e tij kundër dhe mohoi kërcënimet nga ndërkombëtarët.
Por ndryshe nga Chris Dell ish ambasadori i Anglisë, Andy Sparks la sallën e Kuvendit shumë më herët.
Ndërsa ishte opozita kosovare ajo që e kundërshtoi shumë ashpër mënyrën e zgjedhjes së kreut të AKR-së president, duke e konsideruar atë si jo të denjë për t’i përfaqësuar qytetarët e Kosovës.
Pas marrjes së detyrës së presidentit, Behgjet Pacolli nuk u paraqit para gazetarëve. Ai duket se kishte harruar se stafi me të cilin punon ishin përgatitur për t’ja uruar ndërkaq kjo buqetë me lule nuk dihet se ku mund të përfundojë.
Por në rrugët e Prishtinës ka filluar festa e simpatizantëve të AKR-së dhe kreut të saj, Behgjet Pacolli i cili për pesë vjet do të jetë president i Kosovës./tch/

Botuar: 23 Feb 2011
Tregimi tjetër

“Ai (Dell) po thotë shko fol me Hashimin dhe vendosni. Ai përkrah vetëm vendimet që i merrni ju dy... Të askujt tjetër. Ai (Dell) i thotë jo Jakupit...
Atë që nuk e kanë fokusuar kamerat televizive, e sjell Expressi përmes fotografive. Një betejë e vërtetë me mesazhe telefonike është zhvilluar në prapaskenë, përderisa ishte e paqartë nëse do të arrinte Kryetari i AKR’së të zgjidhej President. Protagonistë janë Behgjet Pacolli, Këshilltari i tij, Essad Puskar, Chris Dell. dhe Nexhmedin Spahiu. Një betejë e vërtetë është zhvilluar në prapaskenë, përderisa ishte e paqartë nëse do të arrinte Behgjet Pacolli të zgjidhej President.
Fotoreporteri i gazetës Express, Petrit Rrahmani ka arritur të sjellë një tregim tjetër për ditën e votimit në Parlament me personazh Behgjet Pacollin, Christopher Dellin dhe këshilltarin e Kryetarit të AKR’së, Essad Puskar.
Rrahmani është gjendur një kat sipër tyre dhe ka arritur t’i fotografojë mesazhet telefonike që ata shkëmbenin.
Essad Puskar ka qenë i ulur pranë Ambasadorit Amerikan duke u bërë kështu urë lidhëse mes Shefit të tij dhe Dellit.
Në këtë tregim, ndonëse nuk ishte prezent, u gjend edhe Nexhmedin Spahiu. Prej diku larg Parlamentit, mbase nga Mitrovica, ai e porosiste Behgjet Pacollin që të ketë kujdes nga Hashim Thaçi.


Mesazhet e shkëmbyera
1. Mesazhi i Esad Puskarit për Pacollin:
“BP (Behgjet) jam me Chrisin (Dell’in), ai po pyet a është SLS në pyetje apo kush”.
2. Mesazhi i Pacollit për Dell’in, përmes Esad Puskarit:
“Dell, nuk është SLS, por një fraksion nga PDK. Por duket se raundi i parë i votimit ishte votë e revoltës”.
3. Mesazhi i Pacollit për Dell’in përmes Esad Puskarit:
“Pyete Dell’in çfarë të bëj në raundin e 3’të (të votimit)”

4. Mesazhi i Esad Puskarit për Pacollin:
“Ai (Dell) po thotë shko fol me Hashimin dhe vendosni. Ai përkrah vetëm vendimet që i merrni ju dy... Të askujt tjetër. Ai (Dell) i thotë jo Jakupit. Nëse do të dalësh më mirë në raundin e dytë (të votimit), ai thotë të vazhdosh.

5. Mesazhi i Esad Puskarit për Pacollin:
”Dell (po thotë) më në fund, Fatmiri dhe Jakupi u frikësuan nga kërcënimi. Ai mendon se tani do të kryhet”.

6. Mesazhi i Nexhmedin Spahiut për Pacollin:
“Bëja me dije Hashimit se s’fiton ti, nuk do t’i ketë votat e AKR’së për Qeveri. Loja me Demaçin është e Hashimit (e ka shti n’kurth Vetëvendosjen). Mos u tërhiq para raundit të tretë se qëllimi është me t’frikësu që t’i mu tërhjekë....” (express)/V.I./Liria/