"New York Times"
Shkruajnë: Soren Jessen Petersen dhe Daniel Serwer, ligjërues në Universitetin Georgetown. Ata kanë punuar në çështjen e Ballkanit për 15 vjet.

                       Tallava politika është politikë pa platformë, pa ide, pa vizion…është politikë rrugësh, euforish, propagandash bajate dhe tejet naive. 99% e anëtarëve të partive tallava nuk e kanë lexuar kurrë programin e partisë pas të cilës çirren. Jo për tjetër, por për shkak se ata nuk janë njerëz të leximit. Zaten po të ishin të tillë nuk do të shkonin pas partive tallava. Dua të them edhe politika tallava është popullorçe sikurse siç thash mësipër për muzikën bërllok…dhe jo në kontekst siç kuptohet në perendim, sepse në perendim bërllokun e klasifikojnë nëpër kontenjere: veçmas hidhet letra, veçmas hekurishtet, veçmas plastika e kështu me radhë. Në politikën tonë tallava hyn sikurse në kontenjerët tanë të bërllokut gjithçka. Prandaj kur përzihet shumçka, pa kritere vlerësimi, atëherë edhe bërlloku bëhet i pavlerë, i pa riciklueshëm dhe pa mundësi kompostimi për t'u shndërruar në humus. Kështu lëre që s'mund të flitet për dobi, por vetëm për dëme.

                       Muzika tallava kërcënon artin, bërlloku ekosistemin, kurse politika tallava kërcënon popullin dhe shtetin. Politikës tallava i vie erë injorance. Në mungesë të stretegjisë ekonomike, partia tallava ofron në sofrën e ideve konceptin e nacionalizmit: rrah gjoks se ka guxim të bëjë kërdi…duke druajtur se s'do të ketë mundësi ta marrë votën e meritës, synon ta marrë votën e mëshirës (herë duke luajtur rolin e viktimës) ose të frikës (herë duke luajtur rolin e kërcënuesit). Duke zgjuar ndjenjën e empatisë, ajo herë krijon siç do të shprehemi me nocionin e Kikergardit simpati antipatike e herë antipati simpatike. Politika tallava i kupton sondazhet sikurse të dashuruarit horoskopin dhe mezi pret të dal ndonjë sondazh i ri për t'u vetëkonfirmuar. Partitë tallava i duan më shumë anëtarët dhe ithtarët e padijshëm, sepse vetëm ata nuk i kursejnë duart që t'u duatrokasin fuqishëm e pakufi. Ato e duan më shumë kuantitetin se sa kualitetin. Kur të fitojnë partitë tallava, i shpërndajnë nëpër poste njerëzit inkompetentë, joprofesionistë dhe të pakualifikuar. Në këtë mënyrë ata i shpërblejnë përkrahësit, duke vendosur bile edhe në universitete ligjërues filloristë…s'ka lidhje arsimimi…sepse vetëm kështu merr formën më të mirë tallavaja.

                      Politika tallava i bëri fakultetet e Universitetit Shtetëror tezgje tregu, ku shiten e blihen diploma të falsifikuara…prej nga anëtarët besnikë të saj gdhihen fillorist e ngrysen të diplomuar ose me tituj shkencorë…pastaj diplomat e rrejshme i kalbin dhe i mykin ndërgjegjiet e pranuesve, duke i bërë edhe më fodull e mediokër seç ishin më parë. Tmerri më i madh e më i lemeritshëm është fakti se politika tallava e partive tallava, po e mbjell tallavanë në çdo pore të jetës, për ta korrur fatkeqësisht brezat e gjeneratat e ardhshme…sa bakshish i 'mirë' për ta nga gjyshërit e stërgjyshërit që gjoja u munduan për të mirën e tyre. Sa e sa viktima ka sjell politika tallava…viktima të ndershme që kurrën e kurrës nuk e shijuan meritokracinë, por mjerisht vetëm korrupsionin dhe kleptokracinë. Vazhdojnë ta presin drejtësinë shumë të dëmtuar, të hendikepuar, të gjymtuar e ogurzi, në emër të të cilëve u ndërtuan kështjella premtimesh e shpresash të shumta, por që u kthyen të gjitha së prapthi në xhipa e autovetura superluksoze të liderëve 'karizmatik' që bëjnë politikë me ne e jo për ne.

                      Thonë se populli do të dijë se kë do ta votojë…se populli nuk gabon…se vota e tij është e shenjtë e kështu me radhë. Ashtu qoftë! edhe pse unë shumë dyshoj, sepse për fat të keq shpesh i ka rastisur këtij populli të gabojë. Megjithatë kur ndonjë popull e vulos gabimin me dorën e tij, duke i zgjedhur si përfaqësues të vetin ata që e mashtrojnë atë, atëherë njeriu s'di çfarë t'i bëjë atij populli, përpos ta lëshojë nga thellësia e gjoksit një uratë: "Zoti qoftë me të!"./marrë nga Mesazhi/

/Autori është i diplomuar në filozofi, gazetari dhe sociologji /

Shtypi kosovar

“Serbia ‘pushton’ hekurudhat e Kosovës në veri”

Të përditshmet kosovare

16.12.2008

KOHA DITORE
Një tren i shpejtë nga Beogradi ka arritur të dielën në mëngjes në Zveçan, duke shkelur 38 kilometra brenda linjës së hekurudhave të Kosovës, pa e njoftuar asnjërin prej autoriteteve kosovare, as ndërkombëtare, as vendore. Madje, treni i shpejtë i linjës Beograd-Zveçan nuk është i pari që hyn në Kosovë. Në kundërshtim me vullnetin dhe pa dijeninë e institucioneve kosovare, qysh prej marsit të këtij viti, kur ndërmarrja shtetërore serbe “Hekurudhat e Serbisë” pushtoi një pjesë të hekurudhave në veri të Kosovës, Serbia ka aktivizuar linjën e mëngjesit Kralevë-Zveçan, ndërsa prej shtatorit të këtij viti ka aktivizuar edhe linjën e pasdites në të njëjtin relacion. “Për neve është bërë një okupim klasik... përpos që e ka okupuar hekurudhën dhe e administron, për neve ajo llogaritet se ka marrë edhe territorin, sepse askund tjetër në një shtet tjetër nuk mund të administrojë kompani tjetër ne 40 kilometra hekurudhë. Ky është precedent”, thotë për gazetën Sabit Thaçi, nënkryetar i Sindikatës së “Hekurudhave të Kosovës”...

BOTA SOT
Hapja e një zyre të EULEX-it në Beograd është parë me një sy kritik nga ana e institucioneve të Kosovës, të cilat e quajnë këtë devijim nga rruga për të cilën është nisur EULEX-i në Kosovë. Sipas disa deputetëve, me këtë veprim rikonfirmohet edhe një herë se EULEX-i është thjesht vazhdimësi e UNMIK-ut, por tashmë me një emër të ri... Zëvendëskryeministri Hajredin Kuçi mendon se hapja e një zyre të EULEX-it në Beograd nuk ka për qëllim që t’i japë ndonjë mandat apo lloj të veçantë të autoritetit. Ai pranon se për këtë çështje institucionet e Kosovës kanë pasur konsultime shtesë me shefin e misionit, Ive de Kermabon... Ndërkaq, Ramë Buja, deputet nga radhët e PDK-së, nuk beson se EULEX-i ka devijuar nga ajo për të cilën ka ardhur në Kosovë, por, sipas tij, është e logjikshme se nëse duhet të hapet një zyrë në Beograd, atëherë EULEX-i duhet ta bëjë të njëjtën gjë edhe në vendet fqinje për të koordinuar disa veprime që janë të përbashkëta në momente të caktuara...

EXPRESS
Ende pa u bërë një javë nga funksionalizimi i misionit të BE-së në Kosovë në fushën e sundimit të ligjit, prokurorët e këtij misioni kanë filluar punën në disa raste penale, të cilat vlerësohet të jenë të ndjeshme për t’u lënë në duart e prokurorëve kosovarë. Zyrtarë të EULEX-it kanë konfirmuar të hënë se disa nga prokurorët e tyre po punojnë në këto raste, por janë shumë të rezervuar në dhënien e informacionit. “Prokurorët tanë i kanë marrë disa raste”, ka thënë për Express Kristiina Herodes, zëdhënëse e komponentit të EULEX-it për çështje të drejtësisë. E pyetur se për çfarë rastesh bëhet fjalë, ajo tha se këto janë raste sensitive...

INFOPRESS
Legjislativi i vendit ka miratuar të hënën në parim gjashtë ligje, që dalin si obligim nga pakoja e Ahtisaarit. Me këtë është hapur rruga edhe më tej e krijimit të disa institucioneve relevante për shtetin. Projektligji për të huajt; Projektligji për ndryshimin dhe plotësimin e ligjit për shëndetësinë; Projektligji për gjykatën kushtetuese të Republikës së Kosovës; Projektligji për përbërjen e përkohshme të Këshillit Gjyqësor të Republikës së Kosovës; Projektligji për shërbimin e jashtëm të Republikës së Kosovës; Projektligji për shërbimin konsullor të misioneve diplomatike dhe konsullore të Republikës së Kosovës – janë projektligjet e miratuara në këtë seancë. Këto ligje kanë kaluar në procedurë të përshpejtuar ku nuk ka pasur diskutim të gjatë për ta. Projektligjet në fjalë sot pritet të miratohen pasi që komision ‘ad hock’ të ketë shqyrtuar dhe të ketë dhënë rekomandimet...

ZËRI
Shefi i UNMIK-ut, Lamberto Zannier, ka thënë se rikonfigurimi i pranisë civile ndërkombëtare në Kosovë nuk nënkupton fundin e UNMIK-ut. Në këtë mënyrë, ai ka lënë të kuptohet për një qëndrim më të gjatë të administratës së OKB-së në vend, përkundër pritjeve për një largim të këtij misioni. “Viti 2008 e solli Evropën më afër Kosovës dhe Kosovën më afër Evropës”, ka thënë Zannier në pritjen e organizuar me rastin e festave të fundvitit. Ai ka thënë se viti 2008 i ka sjellë shumë gjëra të rëndësishme Kosovës. “Ky ka qenë një vit shumë i rëndësishëm me ngjarje historike, ka qenë një vit në të cilin UNMIK-u nuk ka qenë në qendër të vëmendjes, siç nuk do të jetë as në vitin 2009. Por, rikonfigurimi nuk do të sjellë fundin e UNMIK-ut. Ne do të vazhdojmë të jemi këtu edhe për një kohë”, ka thënë Zannier...

EPOKA E RE
Një javë pas shtrirjes së misionit të Bashkimit Evropian për forcimin e ligjit në Kosovë, gjendja në Komunën e Mitrovicës, veçanërisht në veri, vazhdon të jetë e qetë dhe stabile. Java e parë e fillimit të punës së EUELX-it ka kaluar pa incidente serioze që do të mund të reflektonin në situatën e përgjithshme në këtë komunë. Kështu është vlerësuar të hënën në mbledhjen e Komitetit për Siguri, që mbahet në kuadër të Drejtorisë për Mbrojtje dhe Shpëtim në Komunën e Mitrovicës dhe ku marrin pjesë përfaqësues të strukturave politike dhe strukturave të sigurisë. Kryetari i komunës, Bajram Rexhepi, ka thënë se ende ekziston nevoja për prani edhe më të madhe të strukturave të sigurisë në lagjet e veriut, si në Lagjen e Boshnjakëve, e cila popullohet nga shqiptarët dhe serbët, në mënyrë që të parandalohet eskalimi i situatës...

KOSOVA SOT
Ndonëse Trupave të Mbrojtjes së Kosovës u kanë mbetur vetëm edhe dy muaj shërbim në misionin e tyre, atëherë kur edhe do të fillojë të formohet Forca e Sigurisë së Kosovës, faza e parë e aplikimit të pjesëtarëve të TMK-së për t’u sistemuar në FSK veçse ka mbaruar, megjithëse ende nuk dihen emrat e as numri i atyre pjesëtarëve që kanë pasur fatin të jenë pjesë e FSK-së. Disa nga pjesëtarët e TMK-së që nuk o të kenë fatin të jenë pjesë e strukturave të FSK-së, do të sistemohen nëpër ministritë dhe institucionet shtetërore të Kosovës. Kështu tha ministri i MSHP-së, Arsim Bajrami. Ministri Bajrami për “Kosova Sot” tha se Qeveria e Kosovës ka formuar një grup punues ndërministror pothuajse nga të gjitha ministritë për të shqyrtuar kapacitetet dhe mundësitë që secila ministri dhe institucion shtetëror i Kosovës në gjirin e tij të inkuadrojë njerëz profesionistë të fushave të ndryshme e që vijnë nga radhët e TMK-së...

LAJM
Prezantimi i dobët i Kosovës në arenën ndërkombëtare, mungesa e një lobi të fuqishëm dhe së fundi “gjashtëpikëshi i Ban Ki Moonit” dhe Deklarata presidenciale e KS-së, kanë ngadalësuar procesin e njohjes së shtetit të Kosovës. Partitë opozitare konsiderojnë se punët dhe veçmas lobimi i dobët i institucioneve – Presidencës, Kryeministrisë dhe Ministrisë së Jashtme, janë fajtorë të këtij stopimi të përkohshëm, të cilët, sipas tyre, nuk po i ndihmon madje as vendosjes së EUELX-it në Kosovë. “Kjo pasi vendosja e EULEX-it nën Rezolutën 1244 e pengon procesin e njohjes dhe nuk ndikon pozitivisht në njohje të reja. Tërthorazi vonesat dhe mosnjohjet e reja janë pasojë edhe e veprimeve të fundit që ndodhën në KS, gjashtëpikëshit dhe Deklaratës presidenciale të KS-së, të cilat së bashku godasin në këtë pikë”, tha për Lajm, Bajram Kosumi, ish-kryeministër i Kosovës dhe anëtar i Kryesisë së AAK-së...

Statusi i Kosovës mbështetet nga Emiratet e Bashkuara Arabe
Kryetarja e Kuvendit mbyll turin e vizitës disa ditore ne vendet arabe

TIRANË 21 janar 2008- Emiratet e Bashkuara Arabe janë të gatshme të mbështesin çdo nismë individuale apo kolektive për pavarësinë e Kosovës. Kështu i është deklaruar kryetares së Kuvendit, Jozefina Topalli nga Kryetari i parlamentit të Emirateve Arabe, Abdul Aziz Abdullah al Ghurair, gjatë një takimi që dy personalitetet kanë zhvilluar. Çështja e Kosovës është diskutuar gjerësisht në takimin mes dy delegacioneve, ku Jozefina Topalli shprehu mirënjohjen për ndihmën e dhënë gjatë krizës së Kosovës në vitin 1999, por edhe në vijim, duke kërkuar mbështetjen e Emirateve të Bashkuara për pavarësinë e Kosovës. Pikërisht, në përgjigje të kësaj kërkese, Al Ghurair garantoi kryeparlamentaren Topalli se Emiratet e Bashkuara do të mbështesin çdo nismë individuale e kolektive për pavarësinë e Kosovës, pasi mbështesin paqen dhe stabilitetin në Ballkan.

Gjatë takimit me kryetarin e Parlamentit të Emirateve të Bashkuara Arabe, një vend të veçantë ka zënë diskutimi për investimet në vendin tonë. Pikërisht, gjatë këtij diskutimi, Topalli dhe Al Ghurair ndanë mendimin se politika dhe politikanët janë ata që duhet të krijojnë klimën e favorshme, bazën ligjore solide në mënyrë që investitorët e dy vendeve të jenë të sigurt në bashkëpunimin e tyre. "Duam të jemi prezent në Shqipëri dhe jemi gati për bashkëpunim,"- tha Al Ghurair, duke shprehur interes për resurset që ofron Shqipëria, mundësitë për investim veçanërisht në energjitikë, infrastrukturë, turizëm e shkëmbime tregtare.Nga ana e saj, Topalli shprehu admirim për ritmin e zhvillimit në këtë shtet me demokraci të re, duke vënë në dukje se disa marrëveshje shumëtë rëndësishme bashkëpunimi ekonomik dy palësh janë në përfundim e pritet tëkrijojnë një bazë të sigurt për bashkëpunimin mes dy vendeve. Kryesimi i delegacionit të parlamentarëve shqiptarë nga zonja Topalli ngjalli interesin e bashkëbiseduesve në të gjithë kryeqytetet e vizituara për rolin e gruas në proceset politike në Shqipëri, si edhe vlerësuan këtë inisiativë të zonjës Topalli për vizitën me ftesë të Kryetarit të parlamentit në Kuvajt, në Katar, Bahrein dhe Emiratet e Bashkuara Arabe. Në këto takime Kryetares së Kuvendit iu garantua mbështetja e plotë dhe e vendosur për njohjen e pavarësisë së Kosovës. /gazeta: Shekulli /

Që prej disa muajsh, një nga idetë më reformuese në politikën e jashtme franceze është krijimi i Bashkimit Mesdhetar. Popujt që kanë fatin të banojnë në brigjet e Mesdheut mund të marrin pjesë në këtë aventurë që synon të hapë perspektiva të reja jo vetëm për rajonin por për gjithë Europën e më tej. "Në Mesdhe mund të vendoset sot e ardhmja e njerëzimit. Në Mesdhe do të vendoset nëse Jugu dhe Veriu do të përballen, nëse fetë dhe qytetërimet do të ndeshen në një luftë, ku askush nuk mund të fitojë, nëse terrorizmi e integrizmi do të mposhtin demokracinë e paqen", ka deklaruar presidenti francez, Sarkozy. Zona e Mesdheut gjithnjë e akoma luhatet midis civilizimit e barbarisë. Nga një anë Perandoria Romake e qytetërimi grek, me zhvillimin dhe dritën që sollën për botën, nga ana tjetër shpërthimet violente nacionaliste dhe dhuna e Kryqëzatave. Kufi natyral i Europës, nëpërmjet të cilit kalojnë flukse në rritje emigrantësh klandestinë drejt veriut, kontrabanda dhe trafiqe, konflikte fetare e territoriale, Mesdheu përqendron frikërat e Europës. Por pa marrë në dorë e pa zgjidhur këto probleme, Europa e plakur ka pak shanse të luajë një rol të vërtetë në këtë shekull. Pikërisht, për këtë arsye Franca po angazhon procesin e krijimit të Bashkimit Mesdhetar.

Por për se bëhet fjalë? Europa dhe vendet e Mesdheut kanë nevojë për njëri-tjetrin. Për arsye demografike, së pari: popullata në plakje e Europës ka nevojë për dinamizmin demografik të Jugut, ku popullata aktive do të jetë në rritje deri në 2020, ashtu si Jugu vazhdon të ketë nevojë për tregjet e punës dhe fuqinë blerëse të Europës. Europa nuk mund të krijojë më në tregun e vet të brendshëm, dinamizmin e mjaftueshëm për të siguruar nivelin e zhvillimit e të jetesës së dekadave të fundit. Zgjerimi në Lindje i BE kishte ndër të tjera edhe këtë objektiv, por deri tash nuk ka dhënë impulset e pritura. Nga ana tjetër pellgu i Mesdheut ka nevojë për kapitalet dhe njohuritë teknologjike te përqendruara në vendet evropiane,për të përshpejtuar zhvillimin e vet ekonomik.

Po aq të rëndësishme janë arsyet energjitike: Jugu e veçanërisht Afrika e Veriut mund të furnizojë me gaz Europën, për t'i siguruar një farë pavarësie nga furnizimet ruse, pavarësi shumë e rëndësishme kjo edhe për politikën evropiane në përgjithësi. Por po të shohim pak më tej, rezervat në hidrokarbure të Mesdheut mund të mbulojnë nevojat për 20 deri në 40 vjet. Në këtë kontekst, pozicioni i hapur i presidentit Sarkozy në fushën e energjisë bërthamore civile, çel perspektiva të reja për gjithë vendet e Mesdheut.

Bashkimi Mesdhetar do të jetë një bashkim politik, ekonomik, e kulturor i shteteve pjesëmarrëse. Ideja nuk është e re. BE ka krijuar prej më se 10 vjetësh Partneritetin Euro Mesdhetar (PEM ose EUROMED), nisur më 1995 në Barcelonë, i cili përfshinte fillimisht 27 vendet e BE dhe 10 partnerë të Mesdheut: Algjeria, Egjipti, Izraeli, Jordania, Libani, Maroku, Siria, Tunizia, Palestina, Turqia. Fillimisht vendet e Ballkanit nuk ishin përfshirë në këtë proces për shkak të instabilitetit në Gadishull, por rishtazi Shqipëria ka aderuar në "Euromed". Por sot është e qartë për të gjithë që "Euromed" nuk ka dhënë rezultatet e pritura, për shumë arsye, ndër të cilat konfliktet e Lindjes së Mesme dhe zgjerimi i BE në Lindje.

Bashkimi Mesdhetar do të jetë i koordinuar me procesin "Euromed", me gjithë shqetësimin e shprehur nga disa prej kancelarive europiane. Ideja është të krijohet një strukturë më elastike sesa "Euromed", pa kaluar nga procedurat burokratike të BE. Organizmat e Bashkimit Mesdhetar do të jenë të ngjashme me organizmat europianë: Këshilli i Mesdheut, Banka Mesdhetare për Investim, një sektor juridik i përbashkët. Partneritetet mund të marrin forma bilaterale ose multilaterale, sipas shteteve të interesuara. Ashtu si Europa filloi me karbonin, çelikun dhe energjinë bërthamore, Bashkimi Mesdhetar do të fillojë me energjinë, transportet, ujin për të respektuar ambientin e për të siguruar zhvillime afatgjata në këtë zonë. Energjia, transportet dhe uji që janë çështje esenciale sot për zhvillimin e Shqipërisë. Një aks tjetër i rëndësishëm është bashkëpunimi mbi emigracionin për të siguruar interesat e të gjitha palëve: nga njëra anë, të sigurohet liria e lëvizjes për ata që e dëshirojnë, sepse lëvizja krijon zhvillim, nga ana tjetër, të favorizohet kthimi i trurit në vendet origjinë sepse vendet e BE nuk do mund të sigurojnë zhvillimin e tyre afatgjatë pa zhvillimin e pellgut mesdhetar.

Objektivat e Bashkimit Mesdhetar do të jenë te ngjashme me strukturat rajonale analoge, të krijuara prej kohësh në zonat ekonomike më aktive të globit në Amerikë dhe Azi. Në dekadat e fundit, zhvillimet gjeopolitike janë orientuar drejt krijimit të këtyre bashkëpunimeve rajonale të tipit Jug-Veri. Kështu ALENA që bashkon SHBA dhe Meksikën, ose East Asian Economic Project që shkon nga Koreja në Singapur.

Bashkimi Mesdhetar, është një organizëm që u propozohet gjithë shteteve që shtrihen në brigjet jugore a veriore, lindore a perëndimore të Mesdheut, si një urë midis Europës, Afrikës së Veriut dhe Lindjes së Mesme.

Franca, e cila kërkon të luajë në Mesdhe rolin unifikues që SHBA luajti në Europë në 1945, ka marrë iniciativën e këtij projekti dhe fton në Paris, në korrik 2008, gjithë shefat e shteteve pjesëmarrëse për të hedhur themelet e Bashkimit Mesdhetar. Vendet që kanë manifestuar interes janë: Franca, Italia, Greqia, Spanja, Portugalia, Malta, Qipro nga BE; Algjeria, Egjipti, Libia, Maroku, Tunizia nga Afrika e Veriut; Izraeli, Libani, Jordania, Siria, Palestina nga Lindja e Mesme dhe Turqia.

Shqipëria duhet të marrë pjesë që në fillim në këtë iniciativë të vështirë dhe ambicioze, për të cilën një nga garancitë e suksesit është energjia e pashtershme e Presidentit francez. Një analizë më e hollësishme e interesit të Shqipërisë në këtë proces meriton një artikull të veçantë. Ç'mund të thuhet këtu në pak rreshta, është se Shqipëria në këtë kuadër mund të ketë fatin të luajë një rol të vërtetë e të mbrojë interesat e veta politike në skenën ndërkombëtare, të konsolidojë interesat ekonomike e furnizimin me energji dhe lëndë të para.

Bashkimi Mesdhetar, ka fatin sot të bëhet epiqendra e Europës dhe Afrikës, për të peshuar së bashku mbi fatet e botës.

* Dr.e Shkencave në Universitetin "Paris 6", Drejtore sektori në Inovacionin e Telekomunikacioneve në Francë, ish-këshilltare e Kryetarit të Bashkisë Tiranë.  / gazeta: Shekulli /