Rekë e Keqe - GJAKOVE (Shtator 2004) - Bisedimet rreth ndërtimit të ujësjellësit regjional në gjashtë fshatra të Rekës së Keqe u zhvilluan në KK të Gjakovës me përfaqësuesit e Ministrisë së Ambientit dhe Planifikimit Hapësinor dhe komunitetit të këtij regjioni.
Kryetari i KK-së Açif Shehu paraqiti bindjen e tij se ky projekt duhet patjetër të finalizohet në mënyrë që të mos humbin mjetet e siguruara tashmë.
“Tenderi për fillimin e punimeve në këtë projekt veçse është përmbyllur por për fat të keq punimet nuk kanë mundur të nisin për faktin se me fshatarët e Batushës nuk është rënë në ujdi për shfrytëzimin e ujërave të burimeve që vijnë prej andej”-tha kryetari i KK të Gjakovës Açif Shehu i cili shprehu gadishmërinë e tij për të biseduar me përfaqësuesit e të gjitha fshatrave në lidhje me rëndësinë e madhe të këtij projekti.
Ujësjellësi regjional i gjashtë fshatrave të Rekës së Keqe ku përfshihen Smolica, Ponosheci, Stublla, Berjaha, Nivokazi dhe Dobroshi është një projekt me rëndësi të veçantë për shtatë mijë banorët e kësaj ane.
Avdi Gjonbalaj, ekspert për ujëra nga Ministria e Planifikimit Hapësinor sqaroi për përfaqësuesit e komunitetit të Rekës së Keqe se ky projekt parasheh furnizimin me ujë të kësaj zone në sasi prej 13.5 litra ujë në sekond.
Gani Hoda, projektuesi i projektit të ujësjellësit regjional të këtyre gjashtë fshatrave të Rekës së Keqe, ka treguar se disa herë është vizituar regjioni në fjalë ku është konstatuar se burimet e bardha dhe të zeza janë tepër të volitshme për të siguruar ujë të pijshëm dhe të mjaftueshëm për këto gjashtë fshatra , pa hendikepuar furnizimin me ujë të fshatit Batushë.
Në takim ishin të pranishëm përfaqësuesit e të gjitha fshatrave në fjalë përveç atyre të Batushës të cilët edhe pse të thirrur disa herë, nuk kanë marrë pjesë në të tilla takime, duke refuzuar edhe jetësimin e këtij projekti.
Sipas grupit të inxhinienierëve të dërguar nga Ministria e Ambientit, fshati Batushë e ka të siguruar ujin për pije ndërkohë që projektin e këtij ujësjellësi ata e refuzojnë me arsyetimin se uji ju nevojitet për ujitjen e tokave bujqësore dhe për bagëti.
Sipas Avdi Gjonbalajt, Batusha ka rreth 150 hektarë tokë e cila ujitet nga pesë kanale ujitës ndaj nuk mund të refuzohet ky projekt i cili është jetik për këto gjashtë fshatra të Rekës së Keqe.
Projekti në fjalë parasheh sigurimin e ujit të pijes edhe për shtimin e numrit të banorëve në 25 vitet në vijim.Në këtë projekt Banka Botërore do të investojë gjashtë milion euro ndërsa KK i Gjakovës ka siguruar 400 mijë euro.
Kryetari i KK të Gjakovës Aqif Shehu tha se ky institucion është gati për fillimin e ndërtimeve në këtë plan i cili prej vitesh është ndër prioritetet e projekteve të Gjakovës. “Ujërat janë pronë e shtetit dhe shteti i administron ato”-tha z. Shehu.