Letër e hapur Ministrit Astrit Haraçija

                                   PSE MË  VODHËT MINISTËR?

Ngelaçit, edhe pse i mundësohet riprovimi, ai prapëseprap ngel!

I nderuari Ministër Haraçija, edhe pse Partia /LDK-ja/, farefisnia e qarshia /Gjakova/, e kanë dijtur fare mirë se kush e çfarë jeni, mirëpo falë lidhjës kumbarore me të ndjerin Kryetarin Rugova, ju dha rasti historik për t’u dëshmuar se përkundër të gjithave mangësive, megjithate do të jeni vigjilent ndaj postit të besuar të Ministrit të MKRSJ-së.

Pas kësaj, ju rritë mendja sa që vepruat ashtu siç nuk kishte vepruar asnjeri pakësa i këndellët. Kurse, me sjelljet autokrate e të papërgjegjshme, pa plan-programe, pa kriteriume profesionale, me eytjet epshike, me korrupsion, me përkrahjen e financimit e spoteve, videokaseta, koncerteve e festivaleve komerciale private e të projekteve kalnore e partiake e me ligësitë tjera, këtë ministri shndërruat në një sulltanat të vetin.

Dorën në zemër, për këtë, fajtorë janë edhe ata që ju kanë emëruar, përkrahur, mbrojtur e besa edhe shfrytëzuar, si dhe vet sistemi ynë anarkik qeverisës.

Ndoshta ju duket se kjo letër është pakësa e vonuar, por jo.

Nga se, po të ju kisha shkruar kur kishit mendjen e m’pirët atëherë s’e njifnin as Zotin, pa le të më të merreni me mua. Kurse tash, kurrë me gjasë “Ju shkuan dhentë“, ndoshta do t’ju vijnë mendët dhe, esullishëm do ta kuptoni porosinë.

Arsyeja e shkrimit të kësaj letre është shumë më konkrete e më e mvetësishme. Ngase, që prej se erdhët në krye të Ministrisë, nuk e dij pse, por çdoherë më keni injoruar e pamundësuar realizimin e projekteve të mia të nisura dhe të pranuara nga vet Ministria, si:

1. Edhe pse ka ndodhur para Jush,

Takimet ndërkombëtare poetike “Kepi i shpresës së mirë”, themelues dhe organizues i së cilit me firmën time “a.s.p.” jam unë, falë ndikimit monist LDK-ist, më është marrë.

2. Ndërkaq, me ardhjen Tuaj, pas fillimit të suksesshëm të Festivalit Ndërkombëtar të monodramës dhe pantomimës FIMPAMI’04, për të cilin Departamenti për Promovime i patë siguruar 20.000 €. Paratë këto, jo që nuk mi dhatë, por edhe më keni mbetur borxh 9.000 € të shpenzuara për organizimin e tij. Ashtu që, në mungesë të parave, kurrë më nuk është mbajtur FIMPAMI, përndryshe festivali i vetëm i kësillojit në Ballkan e i dyti në Evropë.

3. Paratë për “Eksodin’99”, në shumë prej 33.000 € të siguruara nga ish Kryeministri z. Bajram Kosumi, të dedikuara për përfundimin e Kullës së ndërgjegjjës në Kukës, permes ndikimit të qarqeve partiake /LDK-ist/, ato i keni derdhur në konton private të grupacionit matrapaz të shkarkuar nga kjo organizatë. Ashtu që, sot e kësaj dite Kulla ka mbetur e papërfunduar.

4. Projektin e pranuar ndëretnik – “Dasma kosovare“, në mënyrë perfide e keni tjetërsuar dhe pjesërisht, në formë të takimeve kulturore, e keni realizuar në disa qendra kosovare.

5. Në vend se siç ndodh çdokund në qytetërim, për punën kolosale të bërë për manifestimin kushtuar “60 vjetorin e Teatrit Kombëtar të Kosovës“, gjegjësisht në përpilimin e monografisë e cila nga eminentët si z.Ramiz Kelmendi, z. Vehap Shita, është shpallur për “Libër të shekullit“, si dhe për realizimin e manifestimit madhështor festiv, të cilin pa modesti po e them se kam mund ta bëj vetëm unë me ekip. Ju, jo vetëm që nuk më keni shpërblyer, por qe një vit nuk më keni kompenzuar për sajuesit e programit, në shumë prej 12.000€, si dhe as 9.000 € për shpenzimet e përpilimit. Kurse, për botimin e 700 eksemplarëve gjysmak sasi e pamiratuar të monografisë, nga unë në vend se t’i kompenzoni 7.000 €, sa është çmimi real, Shtypshkronjës “Litografia“ ia keni dhënë hiç më pak se 22.000 €.

Kurse, pas vërtetimit se jam unë në pyetje, nuk keni pranuar ta mbani as fjalën e rastit !?

6. Sa i përket rastit të riaktivizimit të Teatrit Popullor të Mitrovicës, opinioni ynë i nderuar është informuar mirëfillisht.

Mirëpo, shtrohet pyetja, ku mbeti ndërgjegjja Juaj z. Haraçija?

7. Gufimi i kupës së durimit tim u bë me rastin e “huazimit” – vjedhjes së idesë e të projektit që parashihte që në Shkallët e Madhështisë së Teatrit Kombëtar, të vendosim pllakat me emrat e më të merituarve të artit dhe të kulturës sonë.

Në fillim Ju na keni përkrahur, por kur erdhi koha që pllakat e proklamuara t’i vendosim, u zhdukët si mjegulla e projekti nuk u realizua. Ndërkaq, tash siç po shihet, atë e keni bërë për t’i mundësuar një piktoreje që me fotografitë e huaja e pa ndonjë kriterium, ta realizoj projektin e saj madhështor, dhe në formë mozaiku ato t’i vendos në ballinën e ndërtesës së Kulturës.

Me këtë rast, Ju si ministër në vend se me ngulmë ta mbroni të drejtën autoriale, të garantuar me ligj, Ju jo vetëm që më keni tradhtuar por edhe më keni vjedhur idenë dhe projektin. Prandaj, po ju pyes – Pse më vodhët Ministër Haraçija ?.

7. Te prijësit e vërtetë të kulturës, kërkesa për financimin e organizimit të Simpoziumit Ndërkombëtar kushtuar “100 vjetorit të filmit shqiptar” planifikuar të mbahet më 27 dhe 28 dhjetor të këtij viti, do të ishte mirëpritur me knaqësi dhe krenari, por kjo nuk ndodhi edhe me Ju!. Ndaj, lehtë mund të ndodhë që për vetëm 20.000 €, të dështoj ky përvjetor i madh i papërsëritshëm i artit dhe i kulturës sonë.

Kurse, përgjegjësia para popullit e historisë do të bie pikërisht mbi Ju zotëri Haraçija.

Pra, një njeri që veten e quan i qytetëruar është për t’u çuditur se si për një mandat kaq të shkurtër, në të gjitha segmentet e ministrisë : në kulturë, në sport, në rini dhe në Jorezidencë, arrijtë të krijoni kaq shumë probleme e armiq, sa që nuk mund të ju shpërlaj Krena, Ereniku e Drini./ qemajl_sokoli@hotmail.com /