Fillon auditimi në televizionin publik, RTK mohon

     Për herë të parë që nga themelimi i Radio Televizionit të Kosovës (RTK), Zyra e Auditorit Gjeneral (ZAGJ) ka filluar auditimi në televizionin publik të Kosovës,ndërkohë që drejtues të RTK-së mohojnë një gjë të tillë. Nga ana tjetër partitë opozitare thonë se çështja e emërimit të bordit është politizuar, ashtu siç është i politizuar edhe vet ky televizion. RTK vetëm për vitin 2007 ka inkasuar nga qytetarët e Kosovës përmes KEK-ut mbi 7 milion euro.

      RTK-ja është themeluar fillimisht përmes një Memorandumi të Mirëkuptimit midis EBU-së (Unioni Evropian i Transmetimeve) dhe OSBE-së (Organizatës për Siguri dhe Bashkëpunim në Evropë) në vitin 1999, mirëpo në televizionin publik të Kosovës për herë të parë që nga themelimi i tij, Zyra e Auditorit Gjeneral ka filluar auditimin, edhe pse drejtues të RTK-së, thonë se një gjë e tillë ende nuk ka filluar, por pritet që kjo të bëhet gjatë këtij muaj. Kjo zyre nuk ka kryer auditime në vitet e kaluara në RTK, por tash auditimi për vitin 2007 është në proces e sipër.

“ZAGJ është duke kryer auditimin e RTK-se, por është ne proces e sipër kështu qe nuk kemi mundësi t’iu informojmë për më shumë informata për momentin. Gjithashtu, Zyra e Auditorit Gjeneral nuk ka kryer Auditime ne vitie e kaluara për RTK-ne, por për vitin 2007 auditimi është në proces e sipër”, ka thënë Bekim Ismaili ushtrues detyre në Zyrën për Informin në ZAGJ.

Ndërkaq, që drejtues të RTK-së i kanë thënë Kosovapressit se ende nuk ka filluar auditimi për vitin 2007 nga Auditori Gjeneral , por një gjë e tillë do të ndodhë gjatë muajt prill.  “Në prill të vitit 2008 sërish sipas ligjit në fuqi për RTK-në, Auditimi i jashtëm do të filloj nga Auditori Gjeneral, pas aprovimit të raporteve financiare nga Bordi i RTK-së”, ka thënë Vjosa Dobruna, kryetare e Bordit të RTK-së.  

Sipas saj, Bordi i Radio Televizionit të Kosovës (RTK) çdo vit kontrollon dhe aprovon raportet financiare te RTK-së, në përputhshmëri me rregulloren e UNMIK-ut 2001/13 dhe pastaj me Ligjin mbi Radiotelevizionin e Kosovës No. 02/L-47.   “Prej vitit 2003, Radio Televizion i Kosovës bën auditim të jashtëm nga auditor të pavarur dhe gjerë më tani raportet origjinale, të cilat i distribohen institucioneve vendore dhe ndërkombëtare botohen në ëeb- site e RTK-së  dhe nuk është gjetur  asnjë parregullsi”, është shprehur Dobruna.

RTK gjatë vitit 2007 ka inkasuar nga qytetarët e Kosovës përmes Korporatës Elektroenergjetike 7.183.277 euro, ndërkaq deri me tani për vitin 2008 KEK  ka inkasuar 150.310 euro ndërsa kanë mbet për tu inkasuar edhe 857.614 euro

Edhe partitë politike vendore konsiderojnë se nuk ka asgjë të keqe dhe është obligim i çdo institucioni publik që të bëjë auditimin.

Fehmi Mujota, nga Partia Demokratike e Kosovës (PDK) konsideron se nuk ka asnjë institucion publik që guxom që mos t’i nënshtrohet procesit të auditimit nga Zyra e Auditorit Gjeneral.

“Konsideroj se nuk ka asnjë institucion publik që guxon të mos i nënshtrohet procesit të auditivit”, është shprehur Mujota.

Edhe ish-kryeministri i Kosovës, Bajram Kosumi, i cili vije nga Aleanca për Ardhmërinë e Kosovës thotë se çështja e auditivit duhet bërë në çdo institucion publik.

“Sa i përket auditivit në RTK kjo është një çështje që duhet bërë rregullisht në çdo institucion buxhetor të Kosovës. Andaj, auditimi duhet bërë gjithmonë”, ka thënë Kosumi.

Nënkryetarja e Lidhjes Demokratike të Dardanisë, Besa Gaxherri, ka vënë në dukje se Auditori Gjeneral duhet bëjë auditivin e RTK-së.

“Duhet të ketë auditim nga Auditori Gjeneral në RTK, kur kihet parasysh se është televizion publik”, ka nënvizuar Gaxherri.

Sidoqoftë, në qershor të vitit 2001 Rregullorja e Transmetimeve e UNMIK-ut 2001/13 krijon formalisht RTK-në si transmetues të shërbimit publik me një Bord jopolitik të Drejtorëve që aktualisht përbëhet nga Vjosa Dobruna, kryetare dhe gjashtë anëtarë: Milazim Krasniqi, Nuhi Rexhepi, Boris Bergant, Snezhana Karaxhiq, Friedhelm Frischenschlager dhe Uros Lipuscek.

Mirëpo, çështja e emërimit të anëtarëve të rinj të Bordit të RTK-së, ka mbetur në sirtaret e Kuvendit të Kosovës, gati për dy vite.

 Esat Brjashori, kryetar i Komisionit për media, thotë se  komisioni që drejton ai do ta diskutojë çështjen e bordit të RTK dhe do të merret në mënyrë të përkushtuar.

“Mund të them se çështja e Bordit të RTK shumë shpejt do të gjendet në tavolinën e komisionit për media, sepse televizioni publik është shumë i rëndësishëm”, ka nënvizuar Brajshori.

Edhe Fehmi Mujota i PDK-së, pohon se Kuvendi shumë shpejtë do të merret më çështjen e emërimit të anëtarëve të Bordit të RTK-së.

Mirëpo, ish-kryeministri Bajram Kosumi, nuk ka informacione se pesë është zvarritur aq shumë çështja e emërimit të anëtarëve të Bordit të televizionit publik.

Ai ka thënë se kjo çështje është paksa e politizuar, ashtu siç është i politizuar edhe vet televizioni publik.

“Besoj se kjo çështje është pak e politizuar, ashtu siç është e politizuar edhe vet RTK.  E di se politizimi është i keq, sepse RTK është televizion publik, dhe e di se nuk bënë të jetë kështu, por konsideroj se Kuvendi duhet ta fus në agjendë çështjen e emërimit të Bordit të ri RTK-së. Asnjëherë nuk është dhënë informata konkrete se pse po ndodhë kjo zvarritje, por fakti se dy herë është filluar procedura  dhe janë ndryshuar ekipet dhe kandidatet, tregon se ka një politizim të kësaj çështje”, ka vlerësuar Kosumi.

Edhe Besa Gaxherri mendon se në Kosovë gjithçka është e politizuar, e në veçanti mediat.

“Zvarritja e emërimit të Bordit të RTK-së të qonë në një konkludim se kjo qeveri, duke mos ndërmarrë hapa më të shpejtë për përzgjedhjen e bordit, pretendon t’i zgjedhë njerëzit që i kontrollon. Mendoj se duhet të punohet që ky televizion të jetë i pavarur, e që fatkeqësisht RTK është një nga TV me të varura”, ka theksuar Besa Gaxherri.

Ndryshe, RTK është televizioni publik i Kosovës, i cili që nga themelimi ka bërë vetëm auditive të jashtme, por Zyra e Auditorit Gjeneral për herë të parë ka filluar auditivin në këtë medium publik./marrë nga Kosovapress/